2Pe 3 | GbrGAW | STEP

2 Peter 3

Yesu Ɓa Jezeɓe

1 – 2 Omi wasika bayi nyi nfyaba, oma zaje, n ɓa gun aba mi, mi zhin atna ma cefye ɓe pa n fya yemi, nna nyaɓo n fye shin ye kpelo, aɓo n fye ɓei tumwi n na anabi agyi-gyi-yi aba n ʼyi ɓedo atnutnu-yi, n ʼyi ɓei ɓe fye n ɓeda eyi Dagayi, n Gniyi nyai nyi.

3 Kmisunyi, miye ma pa fye ge dna n na nyi-pyei kmaknayi, agyekpei ɓei ɓe nɓa ɓei zhin aɓo nukwoi doho-dohoi nɓa kpelo, ɓai ma gaiciya ʼsan. 4 Ɓa ɓei caɓo n layinu ge, “Ce Kristi ɓei ku gna ge wo jeze ɓelo ko? Woi gnina? Wota shan ɓem. Tunyi n sapa shi zaho-zahoi pa ɓelo sun, anya to shando shiɓa ɓei wun esa n na ɓei zhin anyi nyim.”

5 – 6 Ɓa yi ɓahin ge ɓa zamwi ɓai gwokpe ge Shekwoyi ɓei ku anyi zo n nuwan yakwo yi, n na anyi zhin avun, n wo ɓeda egbe nyai, woi ɓo bwa apma zhin n nuwan yi nu wa gmi anyi shi n nuwan yi shekwo-gun njesun. 7 Shekwoyi la gbetu ga njesun ge ala anyi ye n eshe yi pmi shi n tu ena ɓo, n wada nyipyei wyiyi, wyi yi naza nukwoi ɓei bwi cei nyi.

8 Ama fye to ze deye amwin, oma nugundo yeyeyi, nge aye dubu, kwo nyipyei gmanyi ɓa wu ngye nsu nu n Dagayi abam. 9 Wota zhin kalala nu n tu wo alkawali jezeɓenya ɓon, kwo da yake ko wu lonu n saho. Ama wo pminu, n dalili manai-ge woto cei pmalo zaho-zaho ya bwim, wo ye ga a ɓenukwoi zhinyi esa nu ɓa ye abui. 10 Dagayi nyipyei ɓelo ntna kmakma, ntna esa dnayi ngye evi, nsayi eshe ɓei kmi kwoi duya wyeɓo yakwo yi, anya ɓa kpe na nyibmana ena ɓei gyi ɓa, ekni nna nyai ɓa kpe kwo, ena ɓei gyiɓa vinya.

11 Tunda anya vinya n shegunyi laɓa ɓa ɓei wuya, ashe ko to bmiya lo ya se ase gyi-gyi yin? 12 Fye shi nyipyei yi awye, okwo ɓe-ɓe pwai wo fye, ewyi n Shekwoyi ɓei dna eshe cei nyi anya ɓa kpe nanyi bmana vinya ɓa ɓei wuya fi nna nyitala. 13 Ama yi pmi Shekwoyi ɓahin ɓeye, ɓai ye ɓeda bmapmi kasa-ɓala wo a wasika pmibwa ɓai da aɓo n wo to ɓei zhin nufin, shi ɓa shin zhin n na littafi ajeyi-oɓa gyiba kuwa bwi-bwinu alkawalinu, eshe woyi nya, n nanyi woyi yi, aba n ɓefyece nu bwa sese. 14 Oma nugundo ye-yeyi, sa fye zhilo fyei pmi nyipyei ye, Owo ɓeɓe nya, fye zhin kukari fya sase ntna ɓenukwoi zhin yi, fya sase n gyi-gyi-yi, n bugba fuyi n wa bye.

15 – 16 Fye pa nya kwo zhin woyi pmi. Wo ga yi ʼsa nu, yi lo azaje n gni-gni ɓeda yi. Eyi zado ce-cei, n ye-yei da yi Bulus, woku aɓeye kafi n wo a wasika homi. Owa ɓeda ho dnaɓo lo a kpeɓa awyeɓa, aza lo kuwa n ɓa ku ze a acijeyi dna n ɓahin ɓeye, ɓai ye ɓeda bmapmi kasa, ɓa la wo wasika pmibwa ɓai da aɓo n wo to ɓei zhin nufin, shi ɓa shin zhin n na littafi ajei oɓa gyiba kuwa bwi-bwi nu.

17 Mila atnubua pmafye gni to esayi ɓem, ema-zaje-ye-yei, n nabai nfye ɓa kawye to aza nukwoi ye pya ɓa dna fye kwoce har fya miya nfye mizhi mim. 18 Ama fye mwa fi n alheri, n yekpe yi eyi Dagayi n Gniyi yi Yesu Kristi nya. Mwamwa vinya n latu yakwo yi, ɓa kunsun woi nyalo-nyalo. Amin. Sai wyihoi.